Riquete'l del Copete ye un cuentu que nos fala de la guapura y de la importancia de l'autoestima y l'aceptación d'unu mesmu.

Los oxetivos son:

Tresmitir valores de convivencia y aceptación al traviés de los personaxes y les sos interacciones.
Conocer la figura de Charres Perrault y trabayar unu de los sos cuentos dende una perspectiva más actual.
Fomentar el respetu escontra lo distintu o escontra aquello que se sal de los cánones establecíos.
Trabayar competencies y habilidaes fayadices.

De primeres, pueden repasase col alumnáu les cualidaes que presenta caún de los personaxes, pudiendo añedir otres que nun se menten directamente nel espectáculu.

De siguío, cada neñu/a va dir diciendo dalguna virtú o habilidá que tengan que-yos guste y van dise apuntando nel enceráu. De siguío, van pensar sobro la importancia d'estes cualidaes (por casu, soi atentu, y eso ye importante porque ayudo a otres persones y eso fainos sentir bien)...

Tamién puede faese dexando que sían los/les compañeros/es quien escueyan la palabra que meyor define a caún/caúna.

Una vegada tean toles palabres, l’enceráu va tar enllenu de cualidaes y habilidaes que-yos faen especiales y que son importantes pa quien los arrodien. Amás, van poder aprender espresiones nueves.

Pa terminar, pueden apuntase les palabres nuna cartulina y dexales colgaes na paré de la clase.

Esta actividá ayuda a reforzar tanto'l vocabulariu como la espresión oral del alumnáu. Tamién se practica la escucha activa, pues puede aldericase sobro lo qu'otros compañeros resaltaron de sí mesmos. Amás foméntase la empatía y la conocencia emocional y de sí mesmu.

Inclusive pueden trabayase competencies dixitales si pal caltenimientu de l'actividá nun s'opta por una cartulina si non por dalgún mural en Canva o otru programa de diseñu gráficu.